Mar 6 | ASO | STEP | Izesu' aza a'mine ebe' hulo izipahala zuhosi e'meti minavo goto' numu'vela vo heteline'.

Mark 6

Nasalete Aleve Ingine Izesu'ni Di Limi Lani' Gamazi

(Mataio' 13:53-58; Luka' 4:16-30)

1 Izesu' aza a'mine ebe' hulo izipahala zuhosi e'meti minavo goto' numu'vela vo heteline'. 2 Holise' gamene ogavo mono' numungu' mono' apize ngemo neivo evene' muki' ingine gili golize li ti' li lani': Mene ve nene gamazi zalati' dave. Ido' ei' gamazi galau' neine' lo-limine' nene atoli'mine neinako ne'mi monovo nene nado nolive. Ato ato' nite' do soto' neine' nene nado do soto' nomolave. 3 Me ve nene ha Malia' gipele kamuda minive ne neive. Olo. Ido' Zakobole Zosele Zudale Simonile engi' uvo'nibo neive. Alunolo nesi nene lezesi mela none. Ne'mine li ingine mulu'ningu' goloso gilani' ve. 4 Ne'mine ikevo Izesu' ti' lo lo-ngimine': O'moso'mi veleti' gamazi li soto' i ngimaa' ave polohete engikumu' nene evene' muki' gilavo dizisa minaa' naha engi' misubo'ningu' aleve netesi engi' zuho gihile lamine' netesi ido' engi' numu'nine gihileu' ingaa' nave ingine netesi nene engikumu' gilavo dizesa'mine' ne'minosa nazasi nouve lo line'. 5 Ne'mine lo a'mida nene O'moso'mi amuzo do soto' ogo ato' nite' amiline' ogavo inite' gizi dave hamo hamokovo' anadunu' oko'nido' doka' doka' ogo do lamine' o-ngidine'. 6 A'mine numuda aleve ingine gili imamangumu' nene gala muki' giline'.

Izesu' Izipahala Zuho Tuvelu nGimiselavo Mono' Gonolo' Vani' Gamazi

Ne'mine ogavo aza numudo' numudo' mono mono' lo-ngeme ngeme' ogo minine'. 7 Ne'mino mine'mo novo izipahala zuho tuvelu asi lo-ngemo sikalahu' goloso ngimiseli hulilizave lo amuzo ngemo seta' seta' ngimiseline'. 8 Nongimiselo ti' lo lo-ngimine': Aka vilizada hatuso nene ha di vilizaha inite' gohi mo di vamilo. Ado' beleti nene di vami gokisi di vami monisi go'zi di vamilo. 9 Suu' nene ha izi vilisaha sioti nene seta' izi vami hamokovo' izi vilo. 10 Ido' ne'minosasi ma lo-ngimine': Ebe' mala igi ma nene numuno hamokukovo' ingi mini a'mine ebe' hulilizani' gamenelokovo' ga' li vilizave. 11 Numuno malo' nivavo lengele'mize lamine' ami gamazitine gilamavo ma nene lingine huli-ngidi vilisa niigi ma nene ingine engi' monovo'ine gililizangumu' ve li avazaha igi gizedidoti' u'musupo nene okoho' izi di huli vilo. 12 Ne'mine lavo ingine vi evene' muki' lu'ine di velepe' izilizave li li soto' igi li-ngimi'mi vani'. 13 Ne'mine i'mi nivi sikalahu' goloso muki' eveneliti lu'ninguti' ngimiseli huli inite' ngisive muki' uveli noso hili-ngidi di lamine' i-ngidani' ve.

Mono' Noso Holo-ngedaa' Ive Zohane' Hiline' Gamazi

(Mataio' 14:1-12; Luka' 9:7-9)

14 Izesu' guvele nene hutile' ogo vavo guvelesi ve Helode' aza a'mine gamazi nesi giline'. Evene' linge malite Izesungumu' ti' li lani': Noso holo-ngedaa' ive Zohane' ma nene hilinguti' otave. Ne'mo nene ato ato' suno daa' amuzo nene ezela neivosa ato ato' suno nene nodaloseive. 15 Ne'mine lani'za ma nete gomu' polohete Elia' ma ne neive likevo ma nete polohete gozopo' minani' mauti' neive lani'. 16 Ne'mine lani'za Helode' aza lani' gamazi gelo ti' lo line': Neni' luvono gituve Zohane' ma nene gohi ote noloseive.

17 Ido' Zohane'nimu' line' nene nemu' line' ve: Gomu' gala'muda vomine Helode' aza akunolo Hilipo' elenaho Helodia'ni gumine dani'. Gumine davo mono' noso holo-ngedaa' ive Zohane' ne'mo akuna'mi elenahine daine' nene lisihe' amive lo Helode'ni lo-eme'mo vo minine'. Ne'mine lo lo-eme'mo vo minivo nemu' Helode' aza Helodia'nimu' ogo a'mine Zohane'ni nene vi dalizave lo evene' ma ngimiselavo vi analo' di nalava imi ele'mizi di vi nala' numungu' huli-dani'. 19 Ido' Zohane' ne'mine lo miningumu' Helodia' aza Zohanengumu' lukehe do mino bele helelesa gala giline'. 20 Ne'mine ine'za Zohane' aza ve lisihe' mino goloso nite' damaa' ine' monovo'vesi minine' nemu' gele mino ezemu' ehelele izavo Helode' aza gizebo lamine' o-dinako ne'mo nene Helodia' Zohane'ni ngelo belamiline' ine'. Helode' aza Zohane' gamazi nene gamene gamene gelo gala seta' gelaa' ine'za ha gelo lanite' gelaa' ine'.

21 Alinge' Helodia' Zohane'ni beleline' aka ne'mino do soto' molani': Helode' soto' ine' gamene alitavo evene' naba guve'inesi ve ngamani gonolo' hize ele' i-daa' avesi amiliti evene' naba' naba nesi nGalilaia misubokoti' evene' naba' naba nesi elese molo ngemo noso' nite' naba gize vata' ine'. 22 Ne'mine igi ni nizavo Helodia' aluvo aza dizo evene' ve'nido' nene aza oga' ine' melengeni ogavo Helodekisi maka' minavesi ngumo helavo guve'inesi ve Helode' aza a'mine alu nemu' ti' lo line': Gaza inite' mamu' gelo liline' nene mo ha gemelesuve. 23 Ne'mine lo O'moso'mi velelo' noluve lo lo huko ti' lo lo-imine': Inite' ne'mine initekumu' gele nouve lo lo-nemeline' nene ha gemelesuve. Ido' gizebo o nouvoni' misubo nene ho'lo seta' ogo lingela nemukisi liline' nene ha gemelesuve. 24 Lavo aza lemo izelehida ti' lo longo' ine': Nanitekumu' lolove. Lavo izeleho aza ti' lo line': Mono' noso holo-ngedaa' ive Zohane' godolo mamu' lozo. 25 Lavo lite' lo guvelesi ve neida dizo ti' lo line': Mono' noso holo-ngedaa' ive Zohane' godolo nene gito lapeseu' molo nemeline losa noluve. 26 Ne'mine lavo guvelesi ve nene geni biline'za evene' ve'nido' O'moso'mi velelo' lo hukine' nenako nemu' nene aza gamazi'ne lemalive lo gelo 27 lite' lo pilisi ve hamo' ma godolo gito do alive lo imiselavo vo galapuso numungu' luvono gito 28 godolo nene lapeseu' molo do ogo alungo nene emavo aza do izelehine imine'. 29 Ne'mine ogavo Zohane' izipahala zuho ingine gili igi oko'nola di vi geheni muliku' galese izi-dani' ve. Helode' aza Zohane'ni nene ne'mino bele helani' nenako Helode' aza Izesu' guvele nene gelosa a'mine bele hiluve Zohane' nene gohi ote noloseive lo gelosa ne'mine line' ve.

Izesu' Evene' Faef Tauseni (5,000) Noso' Nite' nGemavo Nani'

(Mataio' 14:13-21; Luka' 9:10-17; Zohane' 6:1-14)

30 Izipahala zuhouti' ngimiselive aposolo ingine Izesuda tine' mili igi inite' ani' ido' mono' li-ngimani' nemu' nene vetete' igi li-imani'. 31 Ne'mine ikevo evene' muki' ingine engita igi vigi igi nizavo noso' nite' nalizani' gamenesi ivile' ogavo nemu' Izesu' ti' lo lo-ngimine': La'lisetevo' vo evene' nizamada haza guviselo' mine gelo minelone. 32 Lavo sipiu' angise'inevo' dizi evene' nizamada haza guvisela vani'. 33 A'mida olihe nivavo evene' mukilite ningi engi' nizave li ningi tauni mukikuti' misubou' loti' izi vi gomu' hetelani'. 34 Vi hetelikevo Izesu' sipiuti' nolemo evene' vai' di gese' igi nizavo ningo ingine nene sipisipi izelo' gizebo oga' ive ma nomivo gopo monaa' nani' ne'mine igi minikevo engikumu' muluno hukavo api' ogo inite' muki' apize ngemo minine'.

35 Ne'mine ogo neivo ho' nene lemo vavo izipahala zuho ezela igi ti' li lani': Mene ebe' nene evene' nizamani' hadivelo' nonivo liti'muso gamene alitanaze. 36 Gaza evene' mene ngimiselanivo vi avito' luhuvo numudasi hazalatikisi moni naliza noso' nite'ine meni hizilizaze. nGimiselezo. 37 Likevo Izesu' aza lo-ngimine': Lengi' nene noso' nite' di ngimilevo. Lavo ingine ti' li li-imani': Laza vo moni fo hadeti Kina (K400) ne'minedunu' beleti meni hizo mene aleve nalizave lo ngemekunivo ngelo vo dalihe. 38 Likevo aza ti' lo line': Linginela sikoni nanike' neve. Vi ningilo. Lavo vi ningi ti' li lani': Lezela sikoni faefusi (5) alaha' setakisi neive. 39 Likevo guvise lamineto' ve hizi hizi minilizave lo lo-ngemavo 40 ve hizi di duvaa' lomaa' ani' nene linge ma evene' hadeti (100) ne'mine minika' minika' ikevo linge ma nene evene' fifti (50) ne'mine minika' minika' ani' ve. 41 Ti' igi nizavo sikoni faef nesi (5) alaha' sita' nesi nene do Okulumota vonu' noogo O'moso opo'ni lo a'mine sikoni nene gito apilo izipahala zuho nete ize' mili evene' ngimilizave lo ngemo alaha' setakisi do gito ize' molo mukito' ngimine'. 42 nGemavo evene' mukito' ni gatu'ine ani'. 43 Gatu'ine ogavo sikonisi alahakisi lumo hulani' nene gizeka' igi gosuvaha' tuvelu (12) ne'mine mili vai' lani' ve. 44 Noso' nite' nani' nene vemoho' faif tauseni ne'minelite nani' ve.

Izesu' Aza Noso Avilelo' Lise Lise Vine'

(Mataio' 14:22-23; Zohane' 6:15-21)

45 Ido' evene' nene noso' nite' ni osu' likevo Izesu' aza izipahala zuho nene sipiu' dizi noso hela hole Betesaida numuda gomu' nivilizave lo lite' lo ngimisele hulosa aza nene evene' muki' numu'nida ngimisele hulolosa ogo minine'. 46 Ne'mino mino geke'voke' lo hulo-ngedo aza O'mosola lolosa golola dizo vine'. 47 Ne'mine ogavo liti'muso izavo izipahala zuho vani' sipi nene noso oluso' minavo Izesu' aza asi'vevo' misubola haza mino 48 ningine' nene hepe' ne'mo vilizani' akalati' adi'mo izipahala zuho ingine sipi di vaa' ani' gavosodunu' nene sipi di vilisa ge'nebe goloso igi minani' nene ningine'. Nemu' nene go' lo'mo lomo nedenga' fo kiloku he faif kiloku he nela nene noso avilelo' lise lise vo nizada hetelo ngivile' ogo volosa ine'za 49 noso avilelo' lise lise novivo ingine mukito' ningi golise goloso gilisa holoso ve li gili geke' geke' lani'. Geke' lani'za a'mido' geto Izesu' gamazi lo-ngemo ti' lo lo-ngimine': Neni' ma ne nouze. lengehelele izamivo mini ngi li minilo. 51 Ne'mine lo sipiu' dizo nizada minine'. Dizo nominivo hepe' nene matine'. Matavo nemu' ingine gopo ga'ine goloso gilani'. Gopo ga'ine goloso gilani' nene Izesu' noso' nite' ngimine' gameneu' nene eze monovo ma ningadiniko hepe' matine' nemu' nene gopo ga'ine goloso ma gilamadine'za ga'ine ngolo' lamivo eze monovo olihe ningami minani' nenako ne'mo nene gopo ga'ine goloso gilani' ve.

Izesu' nGenesalete Misubouko Vo Inite' Gizi Dave Muki' Do Lamine' O-ngidine'

(Mataio' 14:34-36)

53 Ne'mine igi noso helala vii nGenesalete misubouko heteli sipi nene noso gahevela na'nava iziki 54 sipiuti' limikevo evene' nete lite' li ei' ve li ningi gili 55 a'mine misubou' numuno mine'mo monida nene loti' izi vi inite' gizi dave holomolo' ingi minani' nene zalo' mili Izesu' neive li lani' ebeta ebeta nene ngele'mizi di vani'. 56 Ido' Izesu' taunila vihe luhuvo numuda vihe hazala vihe a'mida vida vida mini'mi monave nete inite' gizi dave nene ngele'mizi di igi maketi ebe'ine minida minida huli-ngidika' huli-ngidika' igi amuzo mili ti' li li-imani': Okongala inite' lolovolokovo' nevosi di gililizadotikisi nene lamine' ilizani' nenako nemu' nene gele ngemanivo di gililizave li lani'. Ido' oko'nolo' inite' lolovolo' di gilave muki' nene mo lamine' ani' ve.